Ўзбекистон халқ таълими тизимида 11 ойда 27,5 млрд сўмлик ўғирлик ва камомад аниқланди
Андижон шаҳрининг ўзида 11,5 млрд сўм маблағ ўзлаштириб юборилган
Ўзбекиcтон Халқ таълими тизимида сўнгги 11 ойда 27,5 миллиард сўмлик ўғирлик ва камомад аниқланган. Бу ҳақда ЎзА хабар берди.
Маълум қилинишича, Халқ таълими вазирлигида Антикоррупцион ҳафталик доирасида «Очиқ эшиклар куни» ташкил этилган. Тадбирда халқ таълими вазири ўринбосари Темур Комилов халқ таълими тизимида коррупцияга оид қонунбузарлик ҳолатларини олдини олиш ва бартараф этиш йўналишида вазирлик томонидан амалга оширилаётган ташкилий ва амалий ишлар ҳақида сўз юритган.
Қайд этилишича, йил бошидан бери вазирлик томонидан ўтказилган назорат тадбирлари натижасида жами 88 миллиард сўмлик молиявий хато-камчиликлар, шундан 27,5 миллиард сўмлик ўғирлик ва камомад аниқланган. Шунингдек, тадбир давомида тизимдаги энг кўп талон-тарожлик, бюджет маблағларини ўзлаштириш ҳолатлари аниқланган ҳудудлар ҳақида маълумот берилган.
Таъкидланишича, Андижон шаҳрида 11,5 миллиард сўм, Сирдарё вилоятининг Боёвут туманида 11 миллиард сўм ҳамда ушбу вилоятнинг Гулистон шаҳрида 4 миллиард сўм миқдорда бюджет маблағлари ўзлаштириб юборилган. Шунингдек, таркибида жиноят аломатлари бўлган 159 та 72,9 миллиард сўмлик ўрганиш материаллари ҳуқуқий баҳо бериш ва қонуний чоралар кўриш мақсадида ҳуқуқ-тартибот органларига тақдим этилган.
Тадбирда вазирликнинг Назорат-ҳуқуқий хизмати томонидан коррупцияга қарши курашиш борасида амалга оширилаётган ишлар бўйича ҳам батафсил маълумот берилган.
«Хусусан, ҳозирга қадар соҳада йўл қўйилган хато ва камчиликлар юзасидан 243 нафар раҳбар ходимлар эгаллаб турган лавозимларидан озод этилган, 3 минг 415 нафарига нисбатан интизомий жазо чоралари кўрилган, 151 та ҳолат бўйича тўпланган материаллар ҳуқуқ-тартибот идораларига юборилган», — дея таъкидлаган Халқ таълими вазирлигининг Назорат-ҳуқуқий хизмати бошлиғи Искандар Тўраев.
Бундан ташқари, вазирлик томонидан 264 минг 41 нафар ходим ҳуқуқлари ҳимоя қилиниб, 963 нафарининг ҳуқуқи тикланган бўлса, 188 та ҳолатда бошқа давлат органлари томонидан фаолиятга ноқонуний аралашув ва текширувларнинг олди олинган.
Аввалроқ «Халқ банки» 3 триллион сўм зарарга киргани хабар қилинганди. Шунингдек, Ўзбекистон ва Франция коррупцияга қарши курашиш бўйича ҳамкорлик қилиши ҳақида хабар берилди.
