Ўзбекистонда йўловчи ташиш йўналишлари бўйича очиқ тендерлар электрон шаклда ташкил этилади. Бу ҳақда Адлия вазирлигининг Huquqiy axborot канали хабар берди.

Маълум қилинишича, ҳукуматнинг 6 декабрдаги «Автомобиль транспортида йўловчи ташиш йўналишлари бўйича очиқ тендерларни электрон тарзда ташкил этиш чора-тадбирлари тўғрисида»ги қарори қабул қилинган.

Қарорга мувофиқ, 2022 йил 1 январдан 1 мартгача йўловчи ташиш йўналишларини очиқ тендерлар орқали бириктириш бўйича электрон тизим тест режимида жорий этилади. 2022 йил 1 мартдан шаҳар, шаҳар атрофи, шаҳарлараро ва халқаро йўловчилар ташиш йўналишларини бириктириш юзасидан очиқ тендерлар фақат электрон тизим орқали ўтказилади.

Қайд этилишича, қарор билан тендерни ўтказиш тартибига оид низом тасдиқланган. Шунингдек, низомда тендер таклифларига қўйиладиган талаблар, ғолибларни аниқлаш, шартнома тузиш ва бошқа қоидалар белгиланган.

Таъкидланишича, 2022 йил 1 июлгача ҳудудларда жамоат транспортини ривожлантириш концепцияси ишлаб чиқилади.

Аввалроқ Ўзбекистонда расмий ҳужжатларга апостиль қўйишни электрон амалга ошириш мумкин бўлиши хабар қилинганди. Шунингдек, Ўзбекистонда авиаюклар ташувини электрон расмийлаштириш учун «е-Freight» халқаро стандарти жорий этилиши ҳақида хабар берилди.