Ўзбекистонда 2021 йилнинг январь-ноябрь ойларида ер муносабатларига оид 15 минг 416 та қонунбузарлик ҳолатлари аниқланди. Бу ҳақда Кадастр агентлиги матбуот хизмати хабар берди.

Маълум қилинишича, 2021 йилнинг 11 ойи давомида ер участкаларининг ўзбошимчалик билан эгаллаб олиниши ва ушбу ер участкаларида ўзбошимчалик билан иморат қурилишига оид 15 минг 416 та (2496,5 гектар) қонун бузилиши ҳолатлари аниқланган.

Шундан, қишлоқ хўжалигига мўлжалланган ерларда 8395 та (1911 гектар), аҳоли пунктлари ерларда 6331 та (487 гектар) ҳамда саноат, транспорт, алоқа, мудофаа ва бошқа мақсадларга мўлжалланган ерларда 17 та (2 гектар)ни ташкил қилган. Шунингдек, ўрмон фонди ерларда 31 та (3 гектар), сув фонди ерларда 83 та (2 гектар) ва захира ерларда 559 та (91 гектар) ҳолат аниқланган.

Қайд этилишича, аниқланган ер қонун бузилиш ҳолатларини бартараф этиш бўйича бир қатор чоралар кўрилган. Жумладан, 15 минг 416 та ер қонун бузилишини содир этган шахсларга огоҳлантириш хатлари юборилган. Шунингдек, ер қонун бузилиш ҳолатларини бартараф этиш юзасидан туман (шаҳар) ҳокимликларига 8500 та (1173 гектар) тақдимномалар киритилган.

Бундан ташқари, 2655 та (260,3 гектар) ҳолатда судларга киритилган даъво аризаларига асосан 496 та (26,7 гектар) ҳолатда суднинг ҳал қилув қарори (ноқонуний қурилмаларни бузиш бўйича) қабул қилинган. Шу билан бирга, 2159 та (233,6 гектар) ҳолат бўйича суд жараёни давом этмоқда.

Таъкидланишича, ҳуқуқбузарларга нисбатан қонуний чора кўриш учун 4720 та (805,9 гектар) ҳолат юзасидан прокуратура органларига маълумотлар тақдим этилиб, бартараф этиш чоралари кўрилмоқда.

Аввалроқ Президент қишлоқ хўжалигига мўлжалланмаган ер майдонларини хусусийлаштиришга оид қонун имзолагани хабар қилинганди. Шунингдек, Ўзбекистонда боғдорчилик-узумчилик ширкатлари биноларини турар-жой тоифасига ўтказишга рухсат берилгани ҳақида хабар берилди.