Абдулазиз Комиловнинг ўғлига тегишли компания собиқ «Қўқонспирт»ни сотиб олди
Давактив агентлиги «Қўқон биокимё» АЖ устав капиталидаги 99,7 фоиз давлат акциялар пакетини 277,0 миллиард сўмга First Premium Alliance МЧЖга сотиш бўйича келишувга эришилганини маълум қилди. Маълумот учун, First Premium Alliance МЧЖнинг ягона таъсисчиси Комилов Дониёр Абдулазизович ҳисобланади
Давактив агентлиги «Қўқон биокимё» АЖ устав капиталидаги 99,7 фоиз давлат акциялар пакетини 277,0 миллиард сўмга First Premium Alliance МЧЖга сотиш бўйича келишувга эришилганини маълум қилди.
Маълум қилинишича, давлат улушининг 99,7 фоизини хусусийлаштириш учун аризаларни қабул қилиш 2022 йил январь ойида бошланган. UzAssets инвестиция компанияси Deloitte компаниясини маслаҳатчи сифатида, Dentons компаниясини эса юридик ёрдам учун жалб қилди.
Маҳаллий ва халқаро инвесторлардан жами тўртта ариза келиб тушди. Уларнинг исмлари ошкор этилмаган. Натижада давлатга тегишли 99,7 фоиз улуш 277 миллиард сўмга (24,5 миллион долларга яқин) First Premium Alliance компаниясига сотилди.
Завод ҳақида
«Қўқон биокимё» заводи 1983 йилда ўғитлар ишлаб чиқариш учун ташкил этилган. 1991 йилдан бошлаб у этил спирти ишлаб чиқаришга ўтди ва унинг Ўзбекистондаги энг йирик ишлаб чиқарувчилардан бирига айланди – йилига 4,02 миллион декалитр, деб ёзади Spot.
Спиртли ичимликлардан ташқари компания йилига 5360 тоннагача клейковина ишлаб чиқаради. Заводнинг 2021 йилдаги фойдаси 7,72 миллиард сўмни, 2022 йилнинг уч чорагида эса 4,9 миллиард сўмни ташкил этди.
Харидор ҳақида
Агентлик маълумотларига кўра, First Premium Alliance алкоголли ичимликлар улгуржи ва чакана савдосига ихтисослашган компания ҳисобланади. Бугунги кунда компания Legion, Lavini ва Duty Free халқаро аэропорти каби йирик савдо тармоқлари билан ҳамкорлик қилади. Корхоналар ва ташкилотларнинг ягона давлат реестрига кўра, First Premium Alliance МЧЖ 2020 йил декабрь ойида ташкил этилган. Асосий фаолият тури — алкоголли ичимликлар улгуржи савдоси. Ягона таъсисчиси — Дониёр Абдулазизович Комилов.
Тадбиркор, шунингдек, Delta Global Dynamics (бизнес ва бошқарув консалтинги), Progressgortech-Asia (алкоголли ичимликлар чакана савдоси), Gamma Insurance Biznes (ҳаётдан ташқари суғурта), Metropol Group (бизнес ва бошқарув бўйича консалтинг) компанияларига эга.
Metropol Group 2021 йил июнь ойида Тошкентдаги Давлат хавфсизлик хизматининг собиқ биносини 210 миллиард сўмга хусусийлаштирган эди.