«Бизда трансформаторларнинг аксарияти 100 фоиз юклама билан ишлаяпти, аслида бу 70 фоиз бўлиши керак» — Шерзод Хўжаев
Энергетика вазири ўринбосари Kommers.uz билан суҳбатда мамлакат энерготизими ҳеч қачон бундай зўриқиш билан ишлаши керак эмаслигини айтди.
Энергетика вазири ўринбосари Шерзод Хўжаев Kommers.uz билан суҳбатда Ўзбекистон энерготизими ҳақида фикр билдириб, тизим ҳеч қачон ҳозиргидай зўриқиш билан ишлаши керак эмаслигини айтди.
Унинг таъкидлашича, январь ойида бўлган блэкаутнинг ҳам, ҳозирги кунда кузатилаётган узилишларнинг ҳам асосий сабаби битта — тизим ўлароқ мустаҳкамлик бўйича заҳира қолмаган.
«Энерготизим ҳеч қачон бундай зўриқиб ишлаши керак эмас. Оддий мисол сифатида айтаман, ҳаммамиз билган трансформаторларнинг оптимал юкланганлик даражаси 70 фоиз бўлиши керак. Ёниб кетмаслиги, куйиб кетмаслиги, одамлар аномал совуқ ва аномал иссиқ об-ҳаво шароитида кўпроқ кондиционер ёки ‘печка’ ишлатганда чидаб бериши учун 30 фоиз бу ерда заҳира бўлиши керак. Бизда бундай юклама билан ишлаётган қурилмалар жуда кам. Аксарияти 100 фоиз юклама билан ишлаяпти», — деди Шерзод Хўжаев.
Суҳбатни тўлиқ қуйида томоша қилиш мумкин:
Аввалроқ Шерзод Хўжаев АЭС қурилиши сиёсий ёки иқтисодий лойиҳа экани ҳақидаги саволга жавоб бергани хабар қилинганди.
Вазир ўринбосарининг таъкидлашича, бу лойиҳа сиёсий ёки иқтисодий эканига АЭСни қурдираётган мамлакат эмас, уни қураётган мамлакат баҳо беради.
