Instagram раҳбари Адам Моссери платформанинг 2022 йилги режалари ҳақида сўзлаб берди. Бу ҳақда The Verge нашри ёзмоқда.

«Instagram нима эканлигини қайта кўриб чиқишимизга тўғри келади, чунки дунё тез ўзгармоқда ва биз у билан бирга ўзгаришимиз керак», — дейди у.

Моссери Instagram’нинг келгуси йилдаги устувор йўналишларини, жумладан, видеога кўпроқ эътибор қаратишини таъкидлади. Унинг сўзларига кўра, Instagram барча видео маҳсулотларини Reels атрофида бирлаштиради ва ушбу маҳсулотни ривожлантиришда давом этади.

Сўнгги ойларда Instagram видеога бўлган ўз ёндашувини ўзгартирмоқда. Жумладан, платформа IGTV’дан воз кечди. Бироқ, фойдаланувчилар тўлиқ видеони кўриш учун Reels тугмасини босишлари керак.

Моссери блогерлар борасида Instagram ижодкорларга пул ишлашга ёрдам бериш учун кўпроқ монетизация воситаларини жорий этишини айтди. Бундан ташқари, у платформа 2022 йилда хабар алмашиш ва шаффофликка эътибор қаратишини қўшимча қилди.

Шунингдек, Instagram 2022 йилда ота-она назоратини кучайтиради. Платформада март ойида ота-она назорати пайдо бўлиши эълон қилинганди.

Умуман олганда, 2021 йил Instagram учун оғир йил бўлди. Биринчидан, хавфсизлик можароси туфайли Instagram Kids иловасидаги иш тўхтатилди. Иккинчидан, Мета компаниясининг ички ҳужжатларига асосланган ҳисоботлар шуни кўрсатдики, компания Instagramнинг ўсмирлар руҳиятига салбий таъсиридан хабардор бўлган, аммо бу маълумотни яширган.

Декабрь ойида Адам Моссери АҚШ Сенатига Instagram мустақил экспертлар тадқиқот олиб бориши ва платформанинг ёшлар саломатлигига таъсири ҳақида ўз хулосаларини чиқариши учун маълумотларга кириш имкониятини таклиф қилишини ваъда қилган эди.

Аввалроқ Instagram платформасида NFT савдоси йўлга қўйилиши хабар қилинганди.