Ўзбекистонда кам таъминланган оилаларни «Ижтимоий ҳимоя ягона реестри» ахборот тизими орқали аниқлаш, уларга кам таъминланган оилалар болалари учун нафақа ва моддий ёрдам тайинлаш ва тўлаш тартиби тўғрисидаги низом тасдиқланди. Бу ҳақда Адлия вазирлигининг Huquqiy axborot канали хабар берди.

Низомга кўра, ишловчи оналар ёки уларнинг ўрнини босувчи шахслар (бюджет ташкилотларида ишлайдиган оналар ёки уларнинг ўрнини босувчи шахслар бундан мустасно) бола 2 ёшга етгунча уни парваришлаш учун бериладиган ҳар ойлик нафақани олиш муддати тугаганидан сўнг болалар нафақасини олиши мумкин.

Қайд этилишича, болалар нафақаси оиладаги болалар сонидан келиб чиқиб тайинланади. Нафақа 12 ой муддатга тайинланади, бироқ оиланинг энг кичик ёхуд ягона боласи тегишлича 18 ёшга тўлган ойнинг охиригача тўланади. Моддий ёрдам бола (болалар)сиз ёки барча болалари 18 ёшдан катта оилаларга ва якка-ёлғиз фуқароларга 6 ой муддатга тайинланади.

Ушбу нафақа тури оилаларга қуйидаги ҳолатларда тақдим этилади:

• 2021 йил 1 сентябрдан — оиланинг ҳар бир аъзосига жами бир ойлик ўртача даромад 440 минг сўмдан ошмаганда;
• 2022 йилдан бошлаб — оиланинг ҳар бир аъзосига жами бир ойлик ўртача даромад минимал истеъмол харажатлари миқдоридан ошмаганда кам таъминланган деб эътироф этилади.

Таъкидланишича, болалар нафақаси ва моддий ёрдам тегишли аризаларга асосан «Ягона реестр» АТ орқали кам таъминланган оила деб эътироф этилгандан сўнг тайинланади. Ҳар бир оила томонидан ариза топшириш ва «Ягона реестр» АТга киритиш бир ойда бир марта амалга оширилади.

Бундан ташқари, болалар нафақаси ва моддий ёрдам ариза берувчи мурожаат қилган ойдан кейинги ойдан бошлаб тўланади. Қарорга кўра, 2022 йил мартгача жисмоний шахсларнинг дала томорқа ер майдонлари рўйхати шакллантирилиб, тегишли маълумотлар «Ижтимоий ҳимоя ягона реестри» ахборот тизимига тақдим этиб борилади.

Аввалроқ Ўзбекистонда 9 ойда жисмоний шахсларга қанча кредит ажратилгани маълум бўлганди.