Ўзбекистонда 2022 йил давомида миллий валюта 3,9 фоизга қадрсизланди. Бу ҳақда Марказий банкнинг ички валюта бозори ҳолати бўйича шарҳида маълум қилинди.

Маълум қилинишича, 2022 йил давомида миллий валютанинг алмашув курси динамикаси ички валюта бозоридаги талаб ва таклиф факторлари,
шу билан бирга, ташқи ва ички омилларнинг таъсирида шаклланган.

Хусусан, март ойининг дастлабки ҳафталарида хорижий валютага
нисбатан талаб сезиларли даражада ошиши натижасида миллий валюта айирбошлаш курси йил бошига нисбатан 7 фоизгача қадрсизланиши кузатилди. Бу жаҳондаги геосиёсий кескинликларнинг юзага келиши, савдо ҳамкор давлатлар валюталарининг қадрсизланиши ҳамда аҳоли ва хўжалик юритувчи субъектлари девалвацион кутилмаларининг ортиши фонида кузатилган.

«Бунда, пул-кредит сиёсатининг ўз вақтида қатъийлаштирилиши валюта бозорининг барча сегментларида хорижий валютага талабнинг сезиларли даражада пасайишига ва таклифнинг ортишига таъсир кўрсатган бўлса, мослашувчан алмашув курси ташқи шокларнинг салбий оқибатларини юмшатишга хизмат қилди», дейилади Марказий банк хабарида.

Умуман олганда, 2022 йил давомида миллий валютанинг АҚШ
долларига нисбатан тебраниши 10 801–11 572 доллар/сўм диапазонида
шаклланди ва 3,9 фоизга қадрсизланди.

Маълумот учун, миллий валюта алмашув курси динамикаси шаклланиши геосиёсий вазиятнинг ўзгариши, ички валюта бозори иштирокчиларининг кутилмалари ҳамда ташқи молия бозорлари конъюнктурасига боғлиқ бўлади. Марказий банк дисбаланслар ортиб боришининг олдини олиш мақсадида эркин шаклланувчи валюта алмашув курси режимига амал қилиб бориши ҳамда олтин-валюта захиралари нейтраллик принципини таъминлаши қайд этилди.

Аввалроқ 2022 йил январь–декабрь ойларида иқтисодий фаолият турлари бўйича ўртача ойлик иш ҳақининг энг баланд кўрсаткичи банк, суғурта, лизинг, кредит ва воситачилик фаолияти соҳасига тўғри келгани ҳақида хабар берилганди.