Ўзбекистонда 2 февралдан бошлаб газ «заправка»лар фаолияти босқичма-босқич тикланади
Ўзбекистонда 2023 йил 2 февралдан бошлаб маҳаллий ҳокимликлар томонидан тақдим этилган рўйхат асосида АГТКШлар фаолияти босқичма-босқич йўлга қўйилади. Уларнинг фаолият юритиш вақти ҳудудлар шароитидан келиб чиққан ҳолда ҳокимликлар билан келишилган тарзда амалга оширилади
Ўзбекистонда 2023 йил 2 февралдан бошлаб маҳаллий ҳокимликлар томонидан тақдим этилган рўйхат асосида АГТКШлар фаолияти босқичма-босқич йўлга қўйилади. Бу ҳақда Энергетика вазирлиги матбуот хизмати хабар берди.
Эслатиб ўтамиз, аномал совуқ кунларда табиий газни биринчи навбатда аҳоли хонадонлари ва ижтимоий соҳа объектларига етказиб бериш учун автомобилларга газ тўлдириш компрессор шохобчалари фаолияти вақтинча тўхтатилган эди.
Вазирликнинг маълум қилишича, бугунги кунда газ қувурларида босимнинг меъёрга келиши натижасида аҳоли хонадонлари ва ижтимоий соҳа объектларини табиий газ билан бир маромда таъминлаш имкони яратилмоқда.
Шунингдек, АГТКШларнинг фаолият юритиш вақти ҳудудлар шароитидан келиб чиққан ҳолда маҳаллий ҳокимликлар билан келишилган тарзда амалга оширилиши қайд этилди.
«Ҳурматли ватандошлар! АГТКШлар фаолиятидаги вақт чекловлари газ қувурларида босимнинг кўтарилиб боришига мос равишда ўзгартириб борилади», дейилади Энергетика вазирлиги ахборотида.