Ўзбекистонда пилла режаси ортиғи билан бажарилди
Мамлакатда 2020 йилга нисбатан 1,3 фоиз кўпроқ пилла етиштирилган
Ўзбекистонда пилла режаси ортиғи билан бажарилди. Бу ҳақда АОКАда ўтказилган брифингда «Ўзбекипаксаноат» уюшмаси ахборот хизмати раҳбари Сарвиноз Аҳмедова маълум қилди.
Қайд этилишича, республикада 2021 йилда 22,4 минг тонна пилла етиштириш режа-топшириғи белгиланган бўлиб, амалда 22,7 минг тонна пилла хомашёси етиштирилган. Бу эса прогнозга нисбатан 101,3 фоизни ташкил этади. Маълум бўлишича, 2021 йилда етиштирилган пилла хомашёси тизим корхоналари томонидан тўлиқ қайта ишланиб, ипак маҳсулотлари экспортга йўналитирилмоқда.
Таъкидланишича, тизим корхоналари томонидан етиштирилган пилла хомашёсини қайта ишлаш қувватларидан фойдаланиш даражаси 2020 йилда 94 фоизни ташкил этган бўлса, 2021 йилда ушбу кўрсаткич 100 фоизга етказилган. Бундан ташқари, 2021 йилда умимий ҳисобда 117,4 миллион доллар миқдоридаги 101 та инвестицион лойиҳалар амалга ошириб келинмоқда.
Шунингдек, тармоқдаги пиллани қайта ишлаш ва ипак қурти тайёрлаш корхоналари томонидан техник ва технологик жиҳатдан модернизация қилиш ҳамда янги қувватларни ишган тушириш ишларига жами 85 миллион доллар миқдоридаги инвестиция маблағларини ўзлаштиришга эришилган.
Аввалроқ Япониянинг JICA агентлиги Фарғонада ипакчиликни тадқиқ қилиш учун грант ажратиши хабар қилинганди. Шунингдек, Ўзбекистон 9 ойда 1,2 миллиард долларлик калава ип экспорт қилгани ҳақида хабар берилди.
