Renault—Nissan альянси қайта ташкил этилади
Renault ва Nissan ўз альянсини 20 йилдан ортиқ вақт ичида энг катта қайта ташкил этиш бўйича келишиб олди. Келишув шартларига кўра, Renault Nissan’даги улушини қарийб 3 баробарга қисқартиради, япон компанияси эса француз ҳамкорининг электромобиль бизнесига сармоя киритади
Франциянинг Renault автоконцерни ва Япониянинг Nissan компанияси 1999 йилда ташкил этилган альянсини қайта ташкил этишга келишиб олди. Бу ҳақда Nissan автомобиль ишлаб чиқарувчиси сайтида берилди.
Келишув доирасида Renault Nissan’даги улушини 43 фоиздан 15 фоизгача пасайтиради ва Япония компаниясига «аксарият қарорлар учун овоз бериш ҳуқуқи нейтралланган» француз трастининг 28 фоиз улушини беради. Шу билан бирга, Renault ушбу акцияларни сотгунга қадар иқтисодий ҳуқуқларни, шу жумладан, дивидендлар ва сотишдан тушган тушумларни сақлаб қолади.
Nissan, ўз навбатида, электромобиллар ва электромобиллар учун дастурий таъминот бозорида Renault томонидан асос солинган Ampere компаниясига сармоя киритмоқда. Баёнотда сармоя миқдори ошкор этилмаган, бироқ Nissan Ampere компаниясининг стратегик акциядорига айланиш ниятида эканлиги кўрсатилган.
Матбуот хизмати, шунингдек, Renault ва Nissan Лотин Америкаси, Ҳиндистон ва Европадаги асосий автомобиль ва технология лойиҳаларида ҳамкорликни давом эттиришини таъкидлади.
«Қайта ташкил этиш Renault—Nissan альянсининг 20 йилдан ортиқ тарихидаги энг катта ўзгариш бўлади», деб ёзади The Wall Street Journal. Газетанинг ёзишича, ҳамкорлик икки компанияни дунёнинг етакчи автомобиль ишлаб чиқарувчилари қаторига олиб чиқди, шу билан бирга бир вақтнинг ўзида мустақилликни сақлаб, рақобатчилардан устун бўлиш учун бир-бирининг технологиялари ва платформаларидан фойдаланди.
«Бироқ Nissan альянс шартларидан норозилигини билдирди, чунки компания ушбу келишувни тенг эмас деб ҳисоблайди. Қайд этилишича, Renault япон компаниясининг назорат пакети туфайли кўпроқ таъсирга эга», деб таъкидлади WSJ.