«Ростелеком» Алишер Усмоновга тегишли USM Group’дан «МегаФон»ни сотиб олмоқчи
«Ростелеком» миллиардер Алишер Усмоновга тегишли USM Group’дан «МегаФон»ни сотиб олиш бўйича музокаралар олиб бормоқда. Федерал монополияга қарши хизмат эса «Ростелеком» «МегаФон»ни сотиб олиш учун ариза бермагани ҳақида хабар берди. Шунингдек, «Ростелеком», «МегаФон» ва USM Group изоҳ бермаган
«Ростелеком» миллиардер Алишер Усмоновга тегишли USM Group’дан «МегаФон»ни сотиб олиш бўйича музокаралар олиб бормоқда. Бу ҳақда «Коммерсантъ» хабар берди.
Нашр манбасининг маълум қилишича, операторга бошқа даъвогарлар ҳам бор, USM эса аллақачон телекоммуникация активларини қайта тузишни бошлаган. Экспертларнинг таъкидлашича, бу бизнеснинг қийматига энди иқтисодий вазият ва асбоб-ускуналардан фойдаланиш билан боғлиқ муаммолар таъсир кўрсатмоқда ва асосий технологик активларнинг давлатга ўтказилиши хавфларни камайтиришга ёрдам беради.
Нашрнинг ҳукуматга яқин манбага кўра, 2022 йил охирида «Ростелеком» томонидан USM Group’дан «МегаФон»ни сотиб олиши ҳақидаги масала тасдиқлаш учун тақдим этилган. Давлат операторининг активга бўлган қизиқишини яна учта бозор иштирокчиси тасдиқлайди.
«Компанияга ҳар доим талабгорлар бўлиши мантиқан тўғри. Албатта, ҳар қандай таклиф ва сотиш имкониятлари кўриб чиқилади, лекин, албатта, ҳамма нарса муайян шартларга боғлиқ», деди USM’га яқин манба.
Федерал монополияга қарши хизмат эса «Ростелеком» «МегаФон»ни сотиб олиш учун ариза бермагани ҳақида хабар берди. Шунингдек, «Ростелеком», «МегаФон» ва USM Group изоҳ беришдан бош тортган.
«МегаФон» Россиядаги энг йирик телекоммуникация операторларидан бири бўлиб, 74 миллиондан ортиқ мобил алоқа абонентларига хизмат кўрсатади ва 100 фоиз USM Group’га тегишли. «Скартел» (Yota бренди), NetByNet, «МегаФон Ритейл» нинг 100 фоиз акцияларига ҳамда Start видеосервисининг 25 фоиз ва бошқа активларга эгалик қилади. 2021 йил охирида даромад 354,19 миллиард рублни, соф қарз — 244,6 миллиард рублни ташкил этди. 2022 йил май ойида компания молиявий ҳисоботларни ошкор қилишни тўхтатди.
Мавзуга доир: Алишер Усмонов Миллиардерлар индекси бўйича 3,5 млрд доллар йўқотди
