Тадбиркорлар ўзларининг фаолиятидаги текширувлар юзасидан маълумот олиши мумкин
Тадбиркорлар ўзларининг фаолиятидаги текширувлар юзасидан маълумот олиши учун «Ягона давлат назорати» ахборот тизими ишга туширилди. Тадбиркорлик субъектлари текширув ҳақидаги маълумотларни Telegram’даги @tekshiruvinfo_bot орқали ёки SMS тарзида 4064 қисқа рақамга СТИР рақамини юбориш орқали билиб олиши мумкин
Тадбиркорлар ўзларининг фаолиятидаги текширувлар юзасидан маълумот олиши мумкин. Бу ҳақда бизнес-омбудсман матбуот хизмати хабар берди.
Маълум қилинишича, бу бўйича «Ягона давлат назорати» ахборот тизими ишга туширилган. Ахборот тизими орқали тадбиркорлар учун қуйидаги имкониятлар яратилди:
- ўз фаолиятида ўтказилган ёки ўтказилиши режалаштирилган текширувлар тўғрисидаги маълумотни интернет тармоғи ва мобил иловалардан, Telegram-бот ва SMS-хабар тарзида олиш;
- ҳар бир текширув юзасидан текширувни ўтказган назорат органлари ходимларининг хатти-ҳаракатларига баҳо бериш, ғайриқонуний ҳаракатлар, жумладан коррупция ҳолатлари ҳақида шикоят бериш;
- текширувларни рўйхатга олиш китобини электрон форматда тўлдириш.
Шунингдек, тадбиркорлик субъектлари текширув ҳақидаги маълумотларни Telegram’даги @tekshiruvinfo_bot орқали ёки SMS тарзида 4064 қисқа рақамга СТИР рақамини юбориш орқали билиб олиши мумкин.
Бизнес-омбудсман, шунингдек, тадбиркорлардан ‘Ягона давлат назорати’ ахборот тизимидан рўйхатдан ўтиб, назорат қилувчи органлар ходимларининг ноқонуний ҳаракатлари аниқланган ҳолатлар юзасидан мурожаат қилишни сўради.
Аввалроқ Марказий банк молиявий саводхонлик йўналишида IT-Park билан ўзаро ҳамкорлик тўғрисида меморандум имзолагани ҳақида хабар берилганди. Меморандумда аҳоли ва тадбиркорлар молиявий саводхонлигини ошириш таълим дастурлари, тадбирлари ва лойиҳаларини амалга ошириш кўзда тутилган.