Япония авиакомпанияси Ўзбекистоннинг уч шаҳрига парвозларни йўлга қўйиши мумкин
Ўзбекистон ташқи ишлар вазири Владимир Норов Токио шаҳрида All Nippon Airlines компанияси президенти билан учрашди. Япониядан Ўзбекистонга сайёҳлар оқимини кўпайтириш ва тарихий шаҳарларига парвозларни амалга ошириш бўйича музокара ўтказган
Ўзбекистон ташқи ишлар вазири Владимир Норов 22 декабрь куни Токио шаҳрида All Nippon Airlines компанияси президенти Шинъичи Иноуэ билан учрашди. Бу ҳақда вазирлик ахбарот хизмати хабар берди.
Мулоқотда туризм ва авиация соҳаларида икки томонлама муносабатларни янада мустаҳкамлаш истиқболлари юзасидан фикр алмашилди.
Япония томони Ўзбекистонда туризмни фаол ривожлантириш, хорижлик сайёҳлар учун шарт-шароит яратиш, туризм инфратузилмасини кўпайтириш борасида амалга оширилаётган ишлар натижаларини ижобий баҳолади.
Япониядан Ўзбекистонга сайёҳлар оқимини кўпайтириш, жумладан, фуқаро авиациясини барча йўналишларда ривожлантириш имкониятлари мавжудлиги таъкидланди. Шу нуқтайи назардан Самарқанд, Бухоро, Урганч ва Ўзбекистоннинг бошқа тарихий шаҳарларига All Nippon Airlines авиақатновларини йўлга қўйиш масалалари муҳокама қилинган.
