Facebook ва Twitter ижтимоий тармоқлари Россия ва Беларусь билан боғлиқ бўлган, Украинага қарши ташвиқот тарқатувчи ботларни блоклади. Бу ҳақда NBC News Meta’нинг хавфсизлик сиёсати департаменти раҳбари Натаниел Глейхернинг сўзларига таяниб хабар берди.

Маълум қилинишича, компаниялар Украина ҳақидаги дезинформацияни тарғиб қилувчи иккита ташвиқот кампаниясини тақиқлаган. Ботлар Twitter, Instagram, Telegram ва Россия ижтимоий тармоқларида ишлаган.

Ботлар АҚШ ҳукумати Россия разведкаси билан алоқадор деб атаган News Front ва South Front сайтларидаги мақолаларини тарқатган. Шунингдек, ижтимоий тармоқларда Киевлик журналистлар сифатида тақдим этилган сохта шарҳловчилар томонидан ёзилган мақолалар тарғиб қилинган. Материаллар «Зеленский Украинада неонацист диктатурасини яратмоқда» ва «Нима учун Украина янада ёмонлашади» деб номланган.

Иккинчи ташвиқот кампаниясида ҳакерлик ҳисоблари ишлатилган. Meta вакилларининг таъкидлашича, у битта «таниқли Беларусь ҳакерлар гуруҳи» билан боғлиқ. Улар сохта видеони эълон қилган. Видеода украиналик аскар оқ байроқ кўтариб таслим бўлгани тасвирланган.

Бундан ташқари, 25 февраль куни Марк Цукербергнинг Meta компанияси ўз платформасида нафрат уйғотувчи контентни қидириб топадиган ва йўқ қиладиган «Махсус операциялар маркази» ташкил этилишини эълон қилганди. Ташаббус Украинадаги «махсус операция» фонида бошланган.

Она тилида сўзлашувчи мутахассислардан иборат жамоа реал вақт режимида сохта янгиликларни қидиришни ва уларни белгилашни бошлайди, шунингдек, зўравонликни қўзғатувчи ёки Meta сайтлари қоидаларини бошқа йўллар билан бузадиган контентни кузатиб боради.

Аввалроқ Украина бош вазир ўринбосари Илон Маскдан мамлакатни интернет билан таъминлашда ёрдам сўрагани хабар қилинганди. Шунингдек, Facebook Россия давлат ОАВларига реклама жойлаштиришни тақиқлагани ҳамда Twitter Россия ва Украинада реклама кўрсатишни тўхтатгани ҳақида хабар берилди.