АҚШ Ғазначилиги Россияга ташқи қарзига хизмат кўрсатиш имконини берувчи 9C бош лицензиясини янгиламайди. Бу ҳақда Хорижий активларни назорат қилиш департаменти сайтидаги хабарда айтилади.

Лицензиянинг амал қилиш муддати 25 май куни Москва вақти билан соат 07:01 да тугади.

«OFAC қарори Россияни ташқи қарзи бўйича эҳтимолий дефолтга яқинлаштиради», деб таъкидлади Bloomberg.

Санкциялар туфайли Россия ҳукумати хорижий банклар орқали хорижий инвесторларга АҚШ долларида пул ўтказишда муаммоларга дуч келиши мумкин.

«АҚШ банклари ва фуқароларига Россия облигациялари бўйича тўловлар олиш тақиқланади», дея таъкидлади OFAC.

Дефолт яқинми?

Апрель ойида Россия ўз қарзларига хизмат кўрсатиш билан боғлиқ муаммоларга дуч келди: Молия вазирлиги евробондларнинг бир нечта эмиссияси учун рублда тўлашга тайёр эди, аммо охир-оқибат имтиёзли давр тугашидан олдин тўловни чет эл валютасида амалга оширди.

Бунинг учун вазирлик ички доллар захираларидан фойдаланган бўлиши мумкин. Россия Марказий банки санкциялар туфайли халқаро захираларининг ярмидан маҳрум бўлди.

Март ойида Молия вазирлиги Россия умумий активлари 640 миллиард долларга тенг бўлган 300 миллиард долларни тасарруф эта олмаслигини айтди.

Россия 1917 йилги инқилобдан бери ташқи қарзни тўлашдан бош тортгани йўқ. OFAC қарорига қарамай, Россия ҳам дефолтдан қочиш имкониятига эга.

Россия облигациялари эгаларининг аксарияти Европада ва дефолт учун инвесторлар етишмаслиги мумкин. Одатда, чегара қарз эгаларининг умумий сонининг 25 фоизни ташкил қилади.

Қайд этилишича, 27 май куни Россия умумий қиймати 100 миллион долларга яқин тўлов қилиши керак: чекловларни кутган ҳолда Россия ўтган ҳафтада пул ўтказмаларини бошлади.

Умуман олганда, мамлакат 2022 йилда тахминан 1 миллиард доллар купон тўловларини тўлаши керак. Россия газ, нефть ва бошқа табиий ресурсларни сотишдан тушган маблағ эвазига етарлича валютага эгалиги айтилмоқда.

Ўз навбатида, Россия молия вазири Антон Силуанов лицензия узайтирилмаган тақдирда ҳам дефолт бўлиш эҳтимолини истисно қилди. Унга кўра, бу ҳолда Россия ташқи қарзларини рублда тўлайди.

Мавзуга доир: «Барча ёмон ҳодисалар аллақачон содир бўлган»: Россия учун дефолт таҳдиди нимани англатади?