Канаданинг B2Gold компанияси 2022 йил Ўзбекистон конларида геология-қидирув ишларини олиб бориш учун 6 миллион доллар ажратади. Бу ҳақда «Дунё» ахборот агентлиги хабар берди.

Маълум қилинишича, Ўзбекистоннинг АҚШ ва Канададаги элчиси Жавлон Ваҳобов, Давлат геология ва минерал ресурслар қўмитаси раисининг ўринбосари Аъзам Қодирхўжаев Ванкуверда ўтказилган «Ўзгарувчан ва мураккаб иқлим шароитида кон-металлургия саноати: минтақавий тенденциялар, инновациялар ва имкониятлар» мавзусидаги XI халқаро виртуал конференцияда иштирок этган.

Тадбирда Канада кончилик ассоциацияси вице-президенти Бен Чалмерс, Британия Колумбияси провинцияси Фойдали қазилмаларни қидириш ассоциацияси раҳбари Кендра Жонстон, Канаданинг Россия ва Евроосиёдаги бизнес-ассоциацияси (CERBA) раиси Жиль Бретон, Навоий вилоятидаги конларда қидирув ишларини олиб бораётган B2Gold компанияси вице-президенти Нейл Ридер, Қозоғистон, Россия, Мўғулистоннинг кон-металлургия саноати учун масъул вазирлик ва идоралар раҳбарлари, шунингдек, Канаданинг 40 дан ортиқ компанияси вакиллари қатнашган.

B2Gold вице-президенти Нейл Ридер Ўзбекистон фойдали рудалар қазиб олишнинг таъсирчан тарихига эга бўлган дунёга машҳур кончилик юрисдикцияси эканини таъкидлаган.

«Ўзбекистон кучли ва ўсиб бораётган иқтисодиётга эга. Ҳукумат бозор иқтисодиёти сари одимлар экан, хорижий инвестицияларни жалб қилиш, жумладан, кон-металлургия соҳасини янада ривожлантиришга эътибор қаратмоқда», — деган Нейл Ридер.

B2Gold вакилининг айтишича, компания геология-қидирув ишлари учун сўнгги уч мавсумида Ўзбекистонга 10 миллион доллардан ортиқ сармоя киритган. 2022 йилда ушбу мақсадлар учун тасдиқланган бюджет қарийб 6 миллион долларни ташкил этади. Нейл Ридер Ўзбекистон ҳудуди ҳали тўлиқ ўрганилмаганини, бу йўналишда Ўзбекистон-Канада ҳамкорлигини ривожлантириш учун улкан салоҳият мавжудлигини билдирган.

Мамлакатимиз дипломатия миссиясига кўра, конференцияда, шунингдек, Канада абадий музлик ассоциацияси, Табиий ресурслар вазирлиги ҳузуридаги Картография ва ерни кузатиш маркази, Кончилик ассоциацияси, Британия Колумбияси Фойдали қазилмаларни қидириш ассоциацияси ва бошқа кон-металлургия саноати ташкилотлари ҳамда компаниялари раҳбарлари тажриба алмашиш билан бир қаторда Канада компанияларига Евроосиё мамлакатлари кон-металлургия соҳасига кўпроқ инвестиция йўналтиришни тавсия қилган.

Аввалроқ Навоий кон-металлургия комбинати 3 та корхонага бўлингани хабар қилинганди. Шунингдек, Осиё инфратузилма инвестициялари банки Ўзбекистонга 200 миллион доллар кредит ажратиши ҳақида хабар берилди.