Путин «дўст бўлмаган давлатлар»га газни хорижий валюта эвазига етказиб беришни тақиқлади
Фақат ҳукумат комиссиясидан рухсат олган харидор газ учун тўловни одатдагидек амалга ошириши мумкин.
Россия Президенти Владимир Путин «дўст бўлмаган давлатлар»га газни хорижий валюта эвазига етказиб беришни тақиқлади. Бу ҳақдаги фармон Кремлнинг расмий сайтида эълон қилинди.
Маълум қилинишича, Россия «дўст бўлмаган давлатлар» билан амалдаги шартномаларни тўхтатади ва тўлов рублда амалга оширилмаса, етказиб беришни тўхтатади. Янги қоидалар 1 апрелдан кучга киради.
Фармонга кўра, агар газ Россияга ҳамда Россия юридик ва жисмоний шахсларига нисбатан ножўя ҳаракатлар содир этган давлатларга, шунингдек, «дўст бўлмаган давлатлар»да рўйхатдан ўтган хорижий субъектлар билан тузилган шартномалар бўйича етказиб берилса, Россия гази учун тўлов рублда амалга оширилади.
Фармонда «Газпромбанк» ҳисоб-китоблар бўйича ваколатли банк сифатида белгиланди. Чет эллик харидорларнинг аризалари асосида банк уларга етказиб берилган газ учун тўловлар учун «К» типидаги махсус рубль ҳисоб рақамлари ва «К» типидаги махсус валюта ҳисобварақларини очиши шарт. Агар тўлов ўз вақтида олинмаса ёки чет эл валютасида амалга оширилса, шунингдек ваколатли банкка тушмаса, газни экспорт қилиш тақиқланади.
Шунингдек, тўлов схемаси қуйидагича: газ сотиб олаётганда хорижий харидор шартномада кўрсатилган хорижий валютадаги «К» махсус валюта ҳисобварағига маблағларни ўтказади. «Газпромбанк», ўз навбатида, уни Москва биржасида ким ошди савдосида сотади, тушумни харидорнинг «К» махсус рубль ҳисобига киритади ва кейин уни етказиб берувчининг рубль ҳисобига ўтказади. Пул маблағлари ҳисобига киритилгандан сўнг, газ учун тўлов амалга оширилган ҳисобланади.
Фармонда аниқлик киритилишича, фақат хориж сармоясини назорат қилиш учун ҳукумат комиссиясидан рухсат олган харидор газ учун тўловни ушбу қоидаларга риоя қилмасдан амалга ошириши мумкин.
Аввалроқ Германия Россия гази учун евро ёки долларда тўлаши хабар қилинганди. Шунингдек, Путиннинг баёнотидан сўнг Европада газ нархи кескин кўтарилгани ҳақида хабар берилди.