Россияга қарши мисли кўрилмаган санкциялар жаҳон иқтисодиётига салбий таъсир кўрсатиши мумкин. Бу ҳақда The Wall Street Journal Оқ уй Миллий хавфсизлик кенгашининг Европа Иттифоқи ва иқтисодий масалалар бўйича собиқ директори Жулиа Фридландерга таяниб хабар берди.

«Россия иқтисодиёти инқирозининг глобал валюта ва макроиқтисодий барқарорликка таъсиридан хавотирдаман. Биз Россия билан Эрон сценарийси томон ҳаракат қилмоқдамиз, бироқ бу G20’га кирувчи иқтисодиёт ва қазиб олинадиган ёқилғининг йирик экспортчиси билан бир неча кун ичида содир бўлмоқда. Бу мисли кўрилмаган чорадир», — деди Фридлендер.

Хатарлар қаторида у Россиянинг қаттиқ санкцияларга жавобан энергия, буғдой ёки бошқа маҳсулотлар етказиб беришни тўхтатиши мумкинлиги ҳақидаги таҳдидни ҳам санади. Ғарб санкцияларни шу қадар тез киритмоқдаки, Россия иқтисодиёти яқин кунларда «қулаши» мумкин, дея таъкидлайди Фридлендер.

Эҳтимол, янги санкцияларни қўллашдан олдин аллақачон эълон қилинган чекловларнинг бозорларга оқибатларини баҳолаш режали ҳаракат қилиш яхшироқ бўлар еди, дейди эксперт қатъий чораларни қўллаб-қувватлашини таъкидлаган ҳолда.

«Агар бизда қашшоқ, вайрон бўлган Россия иқтисодиёти ва вайрон бўлган Украина бўлса, буларнинг барчасидан нима фойда оламиз?» — дейди мутахассис.

Қайд этиш керакки, аввалроқ АҚШ, Европа Иттифоқи, Буюк Британия ва бошқа давлатлар Москванинг Украинадаги ҳарбий амалиёти туфайли Россия банкига қарши санкциялар жорий етганди. Давлатлар томонидан келишилган чекловлар Россия Марказий банкининг санкцияларга қарши курашиш учун халқаро захиралардан фойдаланишига тўсқинлик қилади.

Бу чоралар Марказий банк активларини «фалаж қилади» ва унинг транзакцияларини «музлатади», деб тушунтирди Европа комиссияси раҳбари Урсула фон дер Ляйен. Бундан ташқари, ушбу санкциялар Россия молиявий регуляторининг халқаро транзакциялар орқали рубль курсини қўллаб-қувватлаш имкониятини чеклайди, деди Германия ҳукумати матбуот хизмати.

Санкциялар муносабати билан 28 февраль куни Россия банки асосий ставкани тарихий максимал 20 фоизга кескин ошириб, «Россия иқтисодиёти учун ташқи шароитлар кескин ўзгарганини» таъкидлади. Регуляторнинг таъкидлашича, ставканинг ошиши «молиявий ва нарх барқарорлигини сақлашга ёрдам беради ва фуқароларнинг жамғармаларини қадрсизланишдан ҳимоя қилади».

Шунингдек, 28 февраль куни Москва биржасида валюта савдолари очилишида рубль кескин тушиб кетди: доллар 25 февраль кунги савдолар ёпилишига нисбатан 7 рублга кўтарилди ва 90 рублни ташкил қилди; евро деярли 8 рублга кўтарилиб, 101,1 рублни ташкил қилди.

Аввалроқ Украинадаги ҳарбий операциялар ортидан Россия халқаро SWIFT тизимидан узиб қўйилиши Ўзбекистонга қандай таъсир қилиши хабар қилинганди. Шунингдек, Россиянинг энг бой миллиардерларига қарши санкция жорий қилиши мумкинлиги ҳақида хабар берилди.