Сенат 2022 йил учун давлат бюджети тўғрисидаги қонунни маъқуллади
Сенат аъзолари томонидан қонун кўриб чиқилди.
Олий Мажлис Сенатининг йигирма иккинчи ялпи мажлисида «2022 йил учун Ўзбекистон Республикасининг Давлат бюджети тўғрисида»ги қонуни муҳокама этилди. Бу ҳақда юқори палата матбуот хизмати хабар бермоқда.
Таъкидланишича, мазкур қонун билан 2022 йил учун асосий макроиқтисодий кўрсаткичлар ва консолидациялашган давлат бюджети даромадлари ва харажатларининг прогнозлари ҳамда 2023–2024 йиллар учун бюджет мўлжаллари белгиланмоқда.
Қайд этилишича, давлат бюджетидан ижтимоий соҳага, хусусан, таълим соҳаси харажатларига 46,9 триллион сўм, соғлиқни сақлаш соҳаси харажатларига 22,8 триллион сўм, маданият ва спорт соҳаси харажатларига 3,4 триллион сўм ва фанни янада ривожлантириш тадбирлари учун 1,5 триллион сўм йўналтириш белгиланмоқда.
Асосий эътибор макроиқтисодий барқарорликни таъминлаш, давлат бюджети харажатларининг самарадорлиги ва натижадорлиги ҳамда иқтисодиётнинг рақобатбардошлигини ошириш, инвестициялар жалб этувчанлик ва ишбилармонлик фаоллигини рағбатлантиришга йўналтирилган солиқ сиёсатини татбиқ этиш мақсадларига қаратилган.
Шунингдек, қонунни ишлаб чиқишда 2022-2026 йиллардаги солиқ ва бюджет сиёсатининг ижтимоий йўналтирилганини таъминлаш, «натижага қаратилган бюджет» тизимини жорий этишга ва бюджет жараёни иштирокчиларининг масъулиятини ошириш тамойилларига қатъий риоя қилинган.
Сенат аъзолари томонидан мазкур қонун маъқулланди.
Аввалроқ Ўзбекистоннинг 2022 йил учун давлат бюджети тақсимланишидаги ўзгаришлар маълум қилинганди.