Федерал Жиноят суди Гулнора Каримовага алоқадор ширкатга тегишли 293 миллион доллардан ортиқ маблағни мусодара қилишга қарор қилди. Бу ҳақда Swissinfo нашри хабар берди.

Қайд этилишича, Каримовага тегишли бўлган Takilant номли ширкат жиноий тергов остидаги 5 та Швейцария банк ҳисобларидан иккитасига алоқадор эди. Компаниядан мусодара қилинган умумий сумма 350 миллион доллардан ортиқни ташкил қилган.

Суд бу сумманинг катта қисми мусодара қилиниши керак деган хулосага келди, чунки айбланувчиларнинг бир қисми, жумладан, Каримова ва унинг ёрдамчиси жиноий пул ювишда айбдор деб топилган. Бироқ Takilant’га тахминан 70 миллион доллар қайтарилади.

«Бунинг сабаби, бир нечта компаниялар билан боғлиқ бўлган ушбу активларнинг барчаси жиноят натижасида қўлга киритилгани аниқланмаган», — дейилади Федерал Жиноят cуди эълон қилган баёнотда.

Ëзилишича, маблағ мусодара қилинганига қарамай, Каримованинг адвокатлари суд қарорини ўзига хос ғалаба сифатида баҳоламоқда. 

«Жиноят ишлари бўйича Федерал суднинг бу қарори, биринчи навбатда, OAG мижозимизнинг Ўзбекистонда бир неча йил ўзбошимчалик билан ҳибсга олинишидан фойдаланиб, унинг барча мол-мулкини мусодара қила олмагани билан боғлиқ», — дейди Каримованинг адвокати Грегуар Мангеат.

Маълумот учун, суд ҳукми билан Гулнора Каримовага 13 йил 4 ой муддатга озодликдан маҳрум қилиш жазоси тайинланган. Маҳкума жазо муддатини Ўзбекистонда ўтамоқда.