Афғонистоннинг муваққат ҳукумати Россия билан иқтисодий, хусусан, газ ва нефть сотиб олиш бўйича ҳамкорликни кенгайтириш ниятида, деди Афғонистоннинг Москвадаги муваққат ишлар вакили Жамол Носир Гарвал «РИА Новости» билан суҳбатда.

«Биз бизнес ва молия соҳасида музокаралар олиб бормоқдамиз. Муайян соҳаларга келсак, ёқилғи, газ сотиб олишдан манфаатдормиз, бу мамлакатимизга биринчи навбатда керак», — деб тушунтирди дипломат.

Жамол Носир Гарвал Кобул Москва билан аниқ келишувларга эришиш ва уларни имзолашга қатъий қарор қилгани айтди. Шунингдек, у ТАПИ газ қувури лойиҳасини амалга ошириш энди хавф остида эмаслигини қайд этди.

«Биз ТАПИ лойиҳаси бўйича ишлар ва лойиҳа доирасидаги ҳамкорлигимиз давом этишини жуда хоҳлаймиз. Айни пайтда буни хоҳлаётганлар кўп», — дея хулоса қилди Гарвал.

Маълумот учун, ТАПИ қувури (Туркманистон – Афғонистон – Покистон – Ҳиндистон) қурилиши 2015 йил декабрь ойида бошланган. Лойиҳага кўра, унинг узунлиги 1814 километр, қуввати эса йилига 30 миллиард куб метр табиий газга етказилади.

Газ қувурининг Афғонистон ҳудудидан ўтиши керак бўлган қисми ички сиёсий зиддият туфайли ҳар доим энг муаммоли ҳолат бўлиб келган. Бироқ Толибон ҳаракати вакиллари ҳокимиятга келганидан кейин лойиҳани давом эттиришга қизиқиш билдирди.

Эслатиб ўтамиз, 23 март куни Президент Путин Россия газининг Европа ва бошқа «дўст бўлмаган давлатлар»га етказиб берилиши учун тўловларни рублга ўтказиш бўйича кўрсатма берди. 

Ой охирида у 1 апрелдан кучга кирган ушбу давлатлар билан ҳисоб-китобларнинг янги қоидаларини белгиловчи фармонни имзолади.